ČEZ odustaje od daljih ulaganja na Balkanu

PRAG, Češka elektroenergetska kompanija ČEZ odlučila da odustane od širenja na balkanskim tržištima i okrene se prije svega gradnji nuklearnih elektrana u Češkoj i Slovačkoj, piše danas češki dnevnik Lidove novini.
“Mnogo manje ćemo investirati u kupovinu kompanija nego u proteklim godinama. Želimo da se orijentišemo na nuklearne elektrane i druge investicije u Češkoj i Slovačkoj”, kazao je generalni direktor ČEZ-a Martin Roman listu Fajnenšel tajms, prenosi češki list. U žiži interesovanja ČEZ-a sada su investicije ukupno vrijedne oko 20 milijardi evra jer počinje izbor partnera za dogradnju dva bloka ČEZ-ove nuklearne elektrane Temelin, koji bi trebalo da budu pušteni u pogon 2019. i 2020.
U planu su i gradnja petog bloka u prvoj češkoj nuklearnoj elektrani Dukovani i modernizacija nuklearne elektrane Jaslovske Bohunjice i gradnja dva bloka u njoj.
ČEZ-u je propalo do sada najveće strano ulaganje koje je planirao, gradnja termoelektrane u mjestu Gacko u Bosni, a nedavno je zbog izmjene uslova tendera odlučio da povuče ponudu za gradnju elektrane na Kosovu. Beta