Ogromni gubici ruske privrede zbog korupcije

MOSKVA, Šteta koju je korupcija pričinila ruskoj privredi dostiže 40 milijardi rubalja godišnje (1,5 milijardi dolara), procijenjuju ruski stručnjaci.
 “Zbog velike prikrivenosti, stvarne razmjere korupcije nemoguće je tačno odrediti”, ukazao je ruski ministar unutrašnjih poslova Rašid Nurgalijev u intervjuu jučerašnjem izdanju lista “Rosijskaja gazeta”.
 “Razmjere se procijenjuju samo uz pomoć socioloških istraživanja i mišljenja stručnjaka. Tako, po mišljenju parlamentarne komisije za borbu protiv korupcije, ukupna šteta koju privreda Rusije trpi zbog korupcije dostiže 40 milijardi rubalja godišnje, dok po nekim procijenama stranih eksperata premašuje 20 milijardi dolara”, rekao je Nurgalijev.
 On je istakao da rezultati anketiranja stanovništva pokazuju da se više od 70 odsto Rusa susreće s nekim oblikom ucjenjivanja mitom.
  Korupcija je, prema njegovim riječima, prodrla u sve sfere i postala neotuđivi element svakodnevnog života.
 “Najstrašnije je što, prema istraživanju niza socioloških centara, većina Rusa korupciju ne doživljava kao kriminalnu pojavu, već kao normalan uslov života”, rekao je ministar.
  Proces ozdravljenja društvenih odnosa  je veoma dug i može potrajati i više od deset  godina, smatra on.
  “Koliko će brzo doći to vrijeme direktno zavisi od naše aktivnosti i od toga da li će ljudi povjerovati u naše namjere da se stvarno borimo protiv korupcije i da li će se uključiti u proces realizacije planiranih mjera”, ukazao je Nurgalijev i dodao da se, bez podrške naroda, cjelokupna delatnost vlade može okončati bezuspješno i pretvoriti se u još jednu bučnu kampanju bez rezultata.