Nazif: Osnivanje “gasnog OPEK-a” preuranjeno

KAIRO, Egipatski premijer Ahmed Nazif  ocijenio je da su dosadašnji pregovori o osnivanju “gasnog OPEK-a”  imali “opšti karakter” i da bi stvaranje takve međunarodne organizacije bilo preuranjeno u sadašnjim okolnostima, prenosi juče agencija Prajm – Tas iz Kaira.
 Nazif je rekao da je upoznat sa pregovorima Rusije, Irana i Katara oko stvaranja “gasnog OPEK” – a, ali je precizirao “da je još rano govoriti hoće li takva organizacija i biti stvorena.”
 “Smatram da je saradnja među državama – izvoznicama gasa neophodna da bi se na svjetskom tržištu održala stabilnost”, kazao je Nazif, uoči njegove predstojeće posjete Rusiji, od 11. do 14. novembra.
 Egipat zauzima treće mjesto u Africi, posle Alžira i Nigerije, prema istraženim rezervama prirodnog gasa koje se procenjuju na oko dva biliona kubnih metara, podsjeća ruska agencija.
 Podaci međunarodnih organizacija pokazuju da Egipat prema ostvarenom godišnjem izvozu tečnog prirodnog gasa sada zauzima peto mjesto u svijetu.
 Rusija, koja raspolaže najvećim nalazištima gasa i vodeći je izvoznik tog energenta, pokušava zajedno sa Iranom i Katarom, koji takođe imaju velike zalihe te sirovine, da pridobije i druge zemlje – velike proizvođače – za realizaciju ideje o stvaranju “gasnog OPEK” -a.
 Libijski vođa Moamer Gadafi je potvrdio prošle sedmice, tokom pregovora sa ruskim predsjednikom Dmitrijem Medvedevom u Moskvi, da je i njegova zemlja, koja je takođe veliki proizvođač i izvoznik gasa, veoma zainteresovana za tesnu saradnju sa tri zemlje koje su već dale pristanak da uđu u “gasni OPEK”.
 Ranije je i predsjednik Venecuele Ugo Čaves ukazao da bi i njegova zemlja, koja je vodeći proizvođač prirodnog gasa u Latinskoj Americi, mogla postati članica “gasnog OPEK-a”.