Nestašica nafte i barel skuplji od 100 dolara?

PARIZ, Nafta bi na svjetskom trištu uskoro mogla da košta i više od 100 dolara za barel, izjavio Kristof de Margeri, predsjednik uprave Totala, treće po veličini naftne kompanije u Evropi.
On je dodao da bi nafta mogla da poskupi sa sedamdesetak dolara po barelu na više od 100 zbog nedovoljnih ulaganja u otkrivanje rezervi nafte i da je samo pitanje kad će cijena nafte skočiti.
“Sadašnja cijena nije dovoljna kako bismo zaštitili dugoročna ulaganja”, izjavio je on i dodao da uz sadašnju cijenu na svjetskom tržištu naftaši nisu motivisani da povećavaju ulaganja, zbog čega sljedi nestašica. “Naftne rezerve su tu, ali ako ne uložite novac u njihovo korišćenje nafta neće doći na tržište”, rekao je de Margeri.
Prema njegovim riječima, za nedovoljna ulaganja ne treba kriviti vodeće zemlje proizvođače nafte, niti njihove državne kompanije koje su smanjenom proizvodnjom pokušale da održe cijenu na prihvatljivom nivou. “Od zemalja koje se nalaze na udaru globalne krize ne možete tražiti da ulažu u potencijalni oporavak naftnog tržišta i da tako pomažu svijetu”, rekao je on.