ARILJE, Put Arilje – Požega, koji su malinari prethodnih dana blokirali, od jutros je ponovo prohodan, nakon što su proizvođači i otkupljivači postigli dogovor da otkupna cijena malina bude 100 dinara po kilogramu.
Sastanak pregovarača trajao je šest časova, a nova cijena kompromisno je rješenje. Akontna cijena, po kojoj je malina otkupljena je 90 dinara, prenose beogradski mediji.
Nezadovoljni proizvođači pet dana su protestovali na barikadi u blizini Arilja tražeći da se otkupna cijena poveća na 126 dinara po kilogramu.
Ministar poljoprivrede Dušan Petrović, koji je posredovao u razgovorima, najprije se sinoć sastao sa otkupljivačima. Razgovoru su se oko 30 minuta poslije ponoći pridružili i proizvođači. Dogovorena cijena za 10 dinara je viša od početne kojoj su maline otkupljene.
Predsjednik udruženja “Vilamet” Dragan Bogdanović kaže da on lično nije zadovoljan novom cijenom, ali da je postignuto kompromisno rješenje.
